Samferdsel

Fylkeskommunen har ansvar for ein stor del av vegnettet og kollektivtrafikken i fylket. Møre og Romsdal har eit stort etterslep på vedlikehaldet av vegnettet, noko som er til hinder for god og trygg transport for innbyggjarar og næringsliv, og hemmar arbeidet for å nå klimamåla våre.

Fylket vårt har mange rasfarlege strekningar, og klimaendringane vil forsterke dette. Vi vil prioritere trygge bruksvegar med gul stripe, og ta igjen det store etterslepet på vedlikehaldet av vegnettet. Både av miljøomsyn, og av transportøkonomiske omsyn, seier vi nei til nye, store motorvegprosjekt som Møreaksen og ferjefri E39.

Skal fleire reise miljøvenleg, trengst gode forbindelsar på tvers av kommune- og fylkesgrenser. Vi må halde fram satsinga på nullutsleppskøyretøy og forbetre kollektivtilbodet.

Vi må leggje betre til rette for mjuke trafikantar, og byggje fleire gang- og sykkelvegar på ein måte som tek omsyn til natur og dyrkamark.

Fylkesvegane

SV er imot Møreaksen og ferjefri E39. Med avgrensa ressursar til samferdsel, er vi tydelege på at vi må prioritere trygge bruksvegar, godt kollektivtilbod og rimelege, hyppige ferjer, framfor å investere tungt i nye motorvegprosjekt. Møreaksen vil binde opp vegmidlane, føre til store naturinngrep og auke klimagassutsleppa. Vi vil heller bruke ressursane på å styrkje kollektivtilbodet, ferjetilbodet og betre kvardagsvegane for folk.

SV vil:

• Prioritere trygge bruksvegar med gul midtstripe og rimelege, hyppige ferjeavgangar over nye, store motorvegprosjekt
• Skrinleggje Møreaksen og Hafast, og seie nei til ferjefri E39
• Redusere vedlikehaldsetterslepet på fylkesvegane. Vi vil prioritere vedlikehald og utbetring av dei vegane som treng det mest ut i frå vegstandard og trafikkmengd
• Få fortgang i skredsikring av dei mest rasutsette områda i fylket, som til dømes Eikesdalen, Norddalsstranda, Tafjord, Trollstigen, Urke-Øye og Geiranger
• Tilpasse infrastruktur og sikringstiltak langs fylkesvegane til å kunne tole effekten av klimaendringane med meir ekstremvêr
• Leggje til rette for god ladeinfrastruktur langs vegnettet
• Gå inn for å støtte Todalsfjordprosjektet, eit viktig saman bindingsprosjekt på indre Nordmøre, og Langfjordforbindelsen Åfarnes-Sølsnes i Romsdal

Kollektivtransport og ferje

SV vil gjere det lettare å reise kollektivt. Personbiltrafikken må ned, medan kollektivtilbodet med buss og hurtigbåt må styrkjast. Vi vil tilby rimelege prisar og rutetider tilpassa lokale forhold.

Møre og Romsdal er eit ferjefylke. Ferjene er å rekne som ein del av vegnettet, og eit rimeleg og hyppig ferjetilbod er avgjerande for både busetnaden og verdiskapinga i fylket.

SV vil:

• Styrkje kollektivtilbodet med hyppigare avgangar og rimelegare pris på buss og ferje
• Prioritere rimelege kollektivbillettar til barn og ungdom, lærlingar og studentar, samt honnør og pensjonistar
• Inkludere personar som tek norskopplæring i studentrabatten på kollektivreiser
• Arbeide for eit nasjonalt ungdomskort med låg pris som skal gjelde kollektivtransport på buss, ferje, tog og hurtigbåt i heile landet
• Utvide fleksible kollektivløysingar som «drosje for buss» (Fram Flexx og Fram Svipp) for å betre kollektivtilbodet i distrikta, og marknadsføre tilboda godt
• Vurdere periodar med gratistilbod på kollektivreiser for å auke bruken, slik vi tidlegare har gjennomført i Ålesund
• Behalde gratistilbodet på Sundbåten i Kristiansund
• Leggje til rette for innfartsparkering kring kollektivknutepunkt i samarbeid med byar og tettstadar
• Arbeide for bypakkar der det vil bidra til ein meir miljøvennleg transport der fleire kan velje å gå, sykle eller reise kollektivt
• At stoppestadar skal ha gode busslommer, busskur og fotgjengarovergangar, og knutepunkt ha venterom som gjer reisa tryggare og meir bekvem
• Sørge for føreseielege ruteplanar for kollektiv- og ferjeruter, og vidareutvikle rutetilbodet i nær dialog med lokalsamfunn og innbyggjarar
• Utgreie moglegheiter for å utvide hurtigbåttilbodet i fylket, så vel som utover fylkesgrensene
• Intensivere overgangen til nullutslepp i kollektiv- og ferjetrafikken gjennom å stille strenge miljøkrav for ruter med buss, ferje og hurtigbåt
• Stille krav om universelt utforma tilkomst på all kollektivtrafikk, haldeplassar og venterom, og lage tiltaksplanar for å rette opp manglar som eksisterer i dag
• Oppretthalde eit hyppig kollektivtilbod mellom tidlegare lokale kommunesenter i samanslåtte kommunar
• Gjere kollektivtransporten meir tilgjengeleg for turistar gjennom satsing på såkalla «travel like the locals»
• Sikre god korrespondanse i kollektivtrafikken i heile fylket, og også over fylkesgrensene. Korrespondansen mellom buss og tog må betrast
• Vere pådrivar for nullutslepp på Raumabanen, og støtte Jernbaneforum Dovre og Raumabanen vidare
• Støtte Lyntogforum og jobbe for framtidig lyntogsamband til fylket
• Bidra til satsing og strategi for bruk av elfly på kortbanenettet, for eit miljø- og distriktsvenleg flytilbod

Sykkel og mjuke trafikantar

Det skal vere trygt og lettvint å velje sykkel eller gonge. Det må etablerast gang- og sykkelveg der fylkesveg er skuleveg, slik at flest mogleg born og unge kan gå eller sykle til skule og fritidsaktivitetar. Skilting og framkome på gang og sykkelvegar må vere god for alle mjuke trafikantar. SV vil utgreie å ta av eksisterande vegareal til sykkelfelt der det er tenleg.

SV vil:

• Prioritere gang- og sykkelveg med belysning rundt skular og typiske bygdesentrum, samt der fylkesveg er skuleveg, og overtaking av drift av desse
• Sørge for fortrinnsvis todelt, samanhengande sykkelvegnett i dei største byane og tettstadane i fylket, og samarbeide med kommunane for å få fullført strekningar som utgjer «hol» i gang- og sykkelvegnettet
• Etablere funksjonell sykkelparkering ved viktige kollektiv- og trafikknutepunkt og gjere det lettare å ta med sykkel på bussen
• Sikre god brøyting og strøing langs gang- og sykkelvegar
• At fylkeskommunale arbeidsplassar skal leggje til rette for sykkel og gonge til arbeid
• Sikre driftsmidlar til betre skilting og framkomelegheit på eksisterande sykkelvegar
• Sørge for eit sterkt samarbeid med Trygg Trafikk
• Minimere tap av natur og matjord ved utbygging av gang- og sykkelvegar ved eksempelvis å vurdere fysisk skilje der det kan vere tenleg
• Vurdere å omdisponere av eksisterande vegareal til sykkelfelt der det kan vere tenleg, og nytte nedklassifisert vegareal til tur- eller sykkelstiar
• Gjennomføre trafikksikringstiltak for mjuke trafikantar over jernbanelinja mellom Øran og Åndalsnes sentrum, samt kryssutbetring på Øran
• Ha med utbygging av gang- og sykkelveg i alle nye vegprosjekt